Tuesday, November 17, 2009
Die einde van die wêreld (deel 2)
Teksgedeelte 2 Pet 3:5-8
2 Pe 3:5 Want moedswillig vergeet hulle dat daar van lankal af hemele was en 'n aarde wat uit water en deur water ontstaan het deur die woord van God,
6 waardeur die toenmalige wêreld met water oorstroom is en vergaan het.
7 Maar die teenswoordige hemele en die aarde is deur dieselfde woord as 'n skat weggelê en word vir die vuur bewaar teen die dag van die oordeel en die verderf van die goddelose mense.
8 Maar laat hierdie een ding julle nie ontgaan nie, geliefdes, dat een dag by die Here soos duisend jaar is en duisend jaar soos een dag.
Tema: Die einde van die wêreld – deel 2
Ons het gesien dat daar mense is wat nie wil glo in die skepping nie en hulle wil ook nie glo in ‘n finale oordeel nie. Die hoofrede waarom hulle dit nie wil glo nie, is omdat hulle word gedryf deur hulle bose begeertes. As hulle moet erken dat daar ‘n God is en dat Hy alles gemaak het, moet hulle uitvind wat Hy sê en doen wat Hy sê. Maar dit pas nie in by hulle lewensstyl nie. Om dit eenvoudig te stel, hulle hou van hulle sondes.
Ray Comfort sê
“A drug addict is dying because of a disease that is related to his addiction. But when a faithful doctor takes the time to point out the evident symptoms that are all over the addict’s flesh, he responded by saying that the hideous spots are normal, and that all his friends have them.
The doctor pleads with him to listen, and says that a large drug company has developed a cure for the fatal disease. To which the addicts says, “What if an elephant fell from the sky and swallowed it before I could get to it? Huh doc. Huh! What about that? You and your stupid pill! I don’t believe the drug company even exists. You idiot…
Why would he acts in such a way? The answer is obvious. He loves his addiction.”
Joh 3:19 En dit is die oordeel: dat die lig in die wêreld gekom het, en die mense het die duisternis liewer gehad as die lig; want hulle werke was boos.
20 Want elkeen wat kwaad doen, haat die lig en kom nie na die lig nie, dat sy werke nie bestraf mag word nie.
So hoekom wil mense nie die Here dien nie? Daar het jy dit: hulle het die duisternis liewer as die lig.
So, nou kom v5 en sê, moedswilliglik vergeet hulle…En dit beteken hulle kies om dom te wees. In die geval kies hulle om nie aan die skepping te dink nie. Van lankal af vergeet hulle dat daar ‘n hemele en aarde was, wat deur die woord van God ontstaan het.
Kom ons gaan so bietjie terug na Genesis toe en kyk hoe Petrus by die skeppings verhaal inpas.
Gen 1:1 In die begin het God die hemel en die aarde geskape.
2 En die aarde was woes en leeg, en duisternis was op die wêreldvloed, en die Gees van God het gesweef op die waters.
KJV
Gen 1:2 And the earth was without form, and void…
Dit was ‘n vormlose massa. En daar was geen lig nie, maar duisternis op die watervloed. En die Gees van God het op die…? WATERS gesweef. Maw toe God in die begin geskape het, het Hy ‘n vormlose massa water geskep in die duisternis.
Die eerste drie dae van die skepping vorm Hy dit as die aarde en die laaste drie dae, skep Hy die plante, die diere en die mens. Die eerste drie dae gee God vorm aan die aarde, die vormlose water massa en die laaste drie dae vul Hy die aarde.
V2 sê, “die Gees het gesweef op die waters.”
God skep dan lig en daarna sien ons wat gebeur in v6:
Gen 1:6 En God het gesê: Laat daar 'n uitspansel wees tussen die waters, en laat dit skeiding maak tussen waters en waters.
7 God het toe die uitspansel gemaak en die waters wat onder die uitspansel is, geskei van die waters wat bo die uitspansel is. En dit was so.
God maak die uitspansel tussen die waters. Hy skei die waters. En v8 sê, Hy noem die uitspansel hemel. Dit is die eerste hemel. Wat is hierdie uitspansel? Die KJV praat van, “…the firmament”
Gen 1:20 En God het gesê: Laat die waters wemel met 'n gewemel van lewende wesens, en laat die voëls oor die aarde vlieg langs die uitspansel van die hemel.
Maw, die uitpansel is die hemelruim waar die voëls vlieg. Die eerste hemel, is ‘n plek waar die voëls vlieg. Die twee hemel is waar die son, sterre en planete is. En die derde hemel is waar God woon.
Psa 148:4 Loof Hom, hoogste hemele en waters wat bo die hemele is!
Dit is interesant. Die vormlose watermassa skei en tussen in ons kry die hemel. So daar is bo die hemel water en onder die hemel water.
Psa 24:1 'n Psalm van Dawid. Die aarde behoort aan die HERE en die volheid daarvan, die wêreld en die wat daarin woon;
2 want Hy het dit gegrond op die seë en dit vasgestel op die strome.
Psa 136:6 Wat die aarde op die water uitgespan het, want sy goedertierenheid is tot in ewigheid.
Bo die uitspansel is daar water en onder die uitspansel is daar water.
Gen 1:9 En God het gesê: Laat die waters onder die hemel hulle op een plek versamel, sodat die droë grond sigbaar word. En dit was so.
(slide)
Sommige wetenskaplikes verneem dat daar ‘n dik water laag was bo die atmosfeer van die aarde en dit was ‘n perfekte omgewing. Hulle sê ook, dit is die rede waarom mense tot 900 jaar oud geword het. Die son se UV strale kon nie deur die water bo die aarde se atmosfeer deurdring nie. Dit was ‘n perfekte omgewing. Maar ons kan onsself net indink hoe moes dit gewees het in die tuin van Eden.
Maar toe het daar ‘n katastrofe die wêreld getref. In Genesis 6 kry ons die vloed. Dit is dan ook dalk waar al die water vandaan gekom het vir ‘n wêreld wye vloed. Die Bybel sê, (Gen 7:11) dat die fonteine van die groot watervloed het oopgebreek. Water het uit die hemel neer gestort.
En dan as ons terug kom na dit wat Petrus sê, dan lees ons
2 Pet 3:5 Want moedswillig vergeet hulle dat daar van lankal af hemele was en 'n aarde wat uit water en deur water ontstaan het deur die woord van God,
6 waardeur die toenmalige wêreld met water oorstroom is en vergaan het.
Wanneer ons kyk na die oorspronkike skepping dat is dit opmerklik hoeveel water daar was. Eers was dit alles water. En daarna verdeel die watermassa en vorm die uitspandsel met water bo en water onder. Die water onder het toe versamel en droë land het gevorm. Petrus sê, die aarde het uit water en deur water ontstaan. Waardeur die toenmalige wêreld met water oorstroom is en vergaan het.
Bottomline is dit: God het in die oorspronklike skepping water ingebou waardeur Hy dit sou vernietig. Hy het dit gevorm uit water en Hy het die vernietig met water.
Dit het egter nie die aarde se bestaan totaal en al uitgewis nie. Dit het ook nie die hemele uitgewis nie. Dit het wel alles verander. En daarom gebruik Petrus hier die woord “kosmos” om te sê, die wêreld het vergaan en nie die aarde het vergaan nie.
Die aarde was nooit weer daarna dieselfde nie. Dinge het drasties verander. Ons kry dan in amper al die ou stamme en nasies se geskiendenis, ‘n storie van ‘n wêreld vloed.
En nou is daar mense wat moedswilliglik dit vergeet. Want as dit waar is, dat God in Sy Almag in die mensdom se geskiedenis kon in stap en hierdie planeet verander het, kan Hy dit weer doen.
Waarom het God dit gedoen?
Gen 6:5 Toe die HERE sien dat die boosheid van die mens op die aarde groot was en al die versinsels wat hy in sy hart bedink, altyddeur net sleg was,
6 het dit die HERE berou dat Hy die mens op die aarde gemaak het, en daar was smart in Sy hart.
Die wêreld was nog nooit altyd net dieselfde nie. Die hele orde van die hemele en die aarde het dramaties verander deur die Woord van God toe Hy al die goddelose mense regoor die hele wêreld laat verdrink het. En dit is vir ons ‘n getuienis dat sonde nie ongestraf gelaat sal word nie. Dinge sal ook nie net altyd aangaan soos dit nou aangaan nie.
Ons is bekommerd oor te veel haarsproei en gasse wat uit ons voertuie se uitlaat pype kom, wat die atmosfeer beïnvloed asof dit die einde van die planeet gaan beteken. Maar daar is Een wat sal sê, dit is genoeg en Hy sal ‘n einde maak aan alles. Nie ek en jy nie.
Valse leraars weier om die ware geskiedenis te aanvaar. Hulle weier om al die bewyse wat daar is te aanvaar. Hulle maak hulle eie geskiedenis op waar God nie deel van is nie en waar mense kan kies hoe om te leef soos hulle wil. Dinge het nie net aangegaan soos altyd nie.
Kan u uself net indink hoe die vloed moes gewees het. Alle mense en diere het gesterf, behalwe agt mense. Alles was vernietig. En God het dit gedoen. En dit is vir ons ‘n voorbeeld van dit wat gaan kom.
2 Pe 3:7 Maar die teenswoordige hemele en die aarde is deur dieselfde woord as 'n skat weggelê en word vir die vuur bewaar teen die dag van die oordeel en die verderf van die goddelose mense.
Die teenswoordige hemele en aarde, die een wat ons ken, die een wat ons ervaar is nie soos die een voor Noag se vloed nie. Dit is anders. Hierdie hemele en aarde wat ons ken, word weggelê as ‘n skat deur dieselfde woord van God, nie vir ‘n vloed nie, maar vir die vuur.
Ons leef tans in ‘n tweede ekologiese sisteem, na die vloed. Dit is deur Sy Woord wat God die eerste sisteem in bestaan gebring het. En dit is deur Sy Woord wat Hy dit vernietig het. En die huidige hemele en aarde word ook weggelê vir die oordeel en die verderf van die goddelose mense. Die eerste keer was dit water, die tweede keer gaan dit vuur wees.
God gaan vuur gebruik om die teenswoordige hemele en aarde te oordeel. Ons kry in Gen 19 ‘n voorbeeld daarvan met Sodom en Gemora.
2 Pet 2:6 en deur die stede van Sodom en Gomorra tot as te verbrand, hulle tot ondergang veroordeel het en as 'n voorbeeld gestel het vir die wat in die toekoms goddeloos sou wees;
Die Ou Testament profete gee vir ons ‘n waarskuwing hiervan.
Jes 66:15 Want kyk, die HERE sal kom in vuur, en sy waens soos 'n stormwind, om in hittigheid sy toorn te openbaar en in vuurvlamme sy dreiging.
16 Want met vuur en met sy swaard sal die HERE strafgerig hou oor alle vlees, en hulle wat deur die HERE verslaan is, sal baie wees.
Dan 7, Mig 1 & 4, Johannes die Doper, hulle sê almal dieselfde ding. 2 Thes 1:8 sê Hy kom in vuur en vlam en oefen wraak op die wat Hom nie ken en die evangelie nie gehoorsaam nie. Vuur gaan uit die hemel neerdaal soos ons lees in Op 20:9. En dan vermoed ek maar dat dit ook uit die aarde gaan opkom. Ons lewe bo-op ‘n vuurbal.
Interesant, vuur kan kom wanneer jy net ‘n atoom split. Wat as die Here al die atome op een oomblik split? Die wêreld sal met een groot stormvuur getref word.
Hierdie wêreld gaan nie verewig so aangaan nie. Die eerste oordeel was deur water, die volgende oordeel kom deur vuur. Petrus sê, hierdie hemele en aarde word vir die vuur bewaar teen die dag van die oordeel.
Kyk na Gen 8, wat gebeur na die vloed.
Gen 8:2 Ook die fonteine van die watervloed en die sluise van die hemel het toegegaan, en die stortreën uit die hemel het opgehou.
Die water het van onder af gekom en van bo af. En toe maak die Here die sluise toe. Die stortreën het opgehou. Die water het toe stadig teruggetrek, en dit het maande geneem.
Gen 8:13 In die ses honderd en eerste jaar, in die eerste maand, op die eerste van die maand, het die waters weggedroog van die aarde af. En Noag het die deksel van die ark weggeneem en uitgekyk, en die aarde was droog--
In v16 sê God vir Noag, gaan uit die ark uit.
Noag het toe altaar gebou en aan die Here geoffer. Daarna het God gesê, Hy sal nie meer alle lewende wesens tref soos wat Hy gedoen het nie. En God maak ‘n belofte wat duidelik gesien kan word. Hy gee ‘n reënboog. En wanneer jy ‘n reënboog sien dan herinner dit jou dat God nie weer die wêreld sal vernietig deur water nie.
Maar deur vuur, BESLIS!
Gen 8:22 Van nou af sal al die dae van die aarde, saaityd en oestyd, koue en hitte, somer en winter, dag en nag nie ophou nie.
Gen 8:22 While the earth remaineth…
Die aarde sal bly bestaan, en wie bepaal dit? God. Saaityd en oestyd, koue en hitte, somer en winter, dag en nag sal nie ophou nie. Dit is God se belofte. Die mens gaan nie die wêreld uitwis nie. Solank as wat God hierdie wêreld onderhou, sal ons hier wees om dit te benut.
God onderhou hierdie aarde. Ons is nog hier, omdat God dit so bepaal. Dit is God wat die laaste sê sal sê, en dan is dit die einde van die wêreld.
Slot
2 Pet 3:8 Maar laat hierdie een ding julle nie ontgaan nie, geliefdes, dat een dag by die Here soos duisend jaar is en duisend jaar soos een dag.
God se tyd is nie my en jou tyd nie. Hy bly in beheer. Al het daar jare verby gegaan. Al het daar 2000 jaar verloop. Moenie dat hierdie een ding julle ontgaan nie. Dit wat vir ons soos ‘n lang tyd lyk, is nie vir God ‘n lang tyd nie. God is altyd op tyd. Hy weet wat Hy doen.
Ek wonder hoeveel smart is daar vandag in God se hart, wanneer Hy na die boosheid van die wêreld kyk. Ek wonder hoeveel berou het God wanneer Hy sien dat mense net nie omgee nie en net aangaan asof dinge asof Hy nie bestaan nie.
Dit is nie meer lank nie, dan gaan God hierdie aarde ook oordeel met vuur en vlam. Wanneer Hy Sy wraak uitoefen oor die wat Hom nie geken het nie.
Die vraag is: Ken jy die Here Jesus Christus?
Die einde van die werêld (deel 1)
Teksgedeelte: 2 Pet 3:1-7
2 Pet 3:1 Dit is reeds die tweede brief, geliefdes, wat ek aan julle skrywe. In albei wil ek deur herinnering julle suiwere gesindheid opwek,
2 sodat julle die woorde kan onthou wat deur die heilige profete tevore gespreek is, en die gebod van ons, apostels van die Here en Verlosser.
3 Dit moet julle veral weet, dat daar aan die einde van die dae spotters sal kom wat volgens hulle eie begeerlikhede wandel
4 en sê: Waar is die belofte van sy wederkoms? Want vandat die vaders ontslaap het, bly alles soos dit was van die begin van die skepping af.
5 Want moedswillig vergeet hulle dat daar van lankal af hemele was en 'n aarde wat uit water en deur water ontstaan het deur die woord van God,
6 waardeur die toenmalige wêreld met water oorstroom is en vergaan het.
7 Maar die teenswoordige hemele en die aarde is deur dieselfde woord as 'n skat weggelê en word vir die vuur bewaar teen die dag van die oordeel en die verderf van die goddelose mense.
Tema: Die einde van die wêreld
Ons het al so baie gehoor oor die einde van die wêreld. Daar was in elke eeu soveel profete gewees wat die einde voorspel het. Julle onthou Y2K. Hoeveel ouens het gesê, dit is nou die einde van die wêreld? Nou ek wil nie vanaand in daardie gat trap nie, want Jesus het gesê niemand weet nie. Maar al wat ek wel vir u kan sê is, ek weet dit is naby.
As ons kyk na die tekens van die tye en die waarskuwings wat Jesus vir ons gegee het, dan weet ek ons moet elke oomblik gereed wees, want die basuine kan enige oomblik blaas. Sy koms is beslis oppad, en baie vinniger as wat ek en jy dink.
Nou, ons kry die begin van die Skepping en dan kry ons die einde van die Skepping. Ons kry die boodskap van die begin en dan kry ons die boodskap van die einde. Hoe dit alles begin het en hoe dit alles sal eindig.
Net God alleen weet dan hoe alles begin het, want Hy alleen was daar toe Hy dit geskep het. Net God alleen weet hoe alles gaan eindig, want net Hy ken die toekoms. Hy ken ook dan nie net die toekoms nie, maar Hy bepaal die toekoms, soos wat Hy die verlede bepaal het en net soos wat Hy die teenwoordige bepaal.
Maw as ons die oorspring, die begin van alle dinge wil verstaan en dan ook die einde, die samevatting van alles, moet ons na Sy openbaring toe gaan wat Hy vir ons gegee het. Alles wat ons weet van die skepping is dit wat God vir ons vertel het en alles wat rondom die einde gaan gebeur, is dit wat God vir ons gesê.
Daar is baie skrifgedeeltes wat verwys na die vernietiging van die heelal waarin ons leef, maar daar is een wat meer in detail is en vanaand gelees in 2 Petrus 3.
Die Gees van God inspireër Petrus om vir ons te sê hoe alles gaan eindig. Om so bietjie agtergrond te gee, is Petrus besig om ons te waarsku teen valse leraars. Daarvan kan ons gaan lees in hoofstuk 2. Petrus sê, hulle gaan kom en dit is hoe hulle gaan wees.
Dan kom ons in hoofstuk 3, en verduidelik Petrus vir ons hoe hierdie valse leraars ons gaan aanval. Hulle gaan byvoorbeeld die bybelse waarhede, dat die heelal tot ‘n einde gaan kom met die koms van Jesus Christus, gaan hulle aanval.
Dit is duidelik dat die skepping in bestaan gekom het deur die Woord van God. En God het gesê, laat daar lig wees. En dit is ook baie duidelik wanneer ons die by die einde kom, die einde ook sal kom deur die Woord van die God.
Maar Petrus weet dat daar is valse leraars wat nie wil glo in ‘n finale oordeel nie. Jy sien, God is heilig en daarom haat Hy sonde en straf Hy sondaars. En mense hou nie daarvan nie. Mense hou van hulle sondes, maar hulle hou nie van die idee van ‘n God wat oordeel nie.
Petrus begin dan met die spotters en hulle wat nie glo in die wederkoms van Christus nie, wanneer Hy kom om die heelal te oordeel. Kyk dan wat is die argumente wat die spotters gebruik. Hulle sê, die wêreld gaan maar aan soos dit nog altyd aangegaan het. Hulle sê dat daar nie ‘n oordeel of verwoesting kom nie.
2 Pet 3:3 Dit moet julle veral weet, dat daar aan die einde van die dae spotters sal kom wat volgens hulle eie begeerlikhede wandel
4 en sê: Waar is die belofte van sy wederkoms? Want vandat die vaders ontslaap het, bly alles soos dit was van die begin van die skepping af.
Dit is hoe hulle argumenteer. Nou ons noem hierdie tipe argument ‘n ad hominem en beteken dat hulle eerder die persoon aanval as wat hulle die spesifieke saak aanspreek op ‘n redelike wyse. Hulle argumenteer deur die persoon te spot, of te intimideer. Dit is ‘n emotionele argument en nie ‘n rationele argument nie. Hulle speel op mense se onvervulde hoop en op hulle overvulde verwagtinge. Maw hulle speel op mense se gevoelens.
V3 sê dat daar aan die einde van die dae spotters sal kom. Baie in die vroeë kerk het die Here spoedig verwag. Die apostels het geglo dat Jesus in hulle tyd sal kom. Paulus verwys na homself, wanneer hy sê dat ons wat in die lewe oorbly sal saam met hulle weggevoer word, die Here tegemoed in die lig. Hulle het die Here se koms verwag in hulle eie leeftyd.
Jesus het vir hulle gesê, “…Dit kom julle nie toe om die tye of geleenthede te weet wat die Vader deur sy eie mag bepaal het nie.” Petrus het wel geweet dat Jesus nie sal kom voordat hy sterf nie, want in Joh 21 sê Jesus vir hom dat hy gearresteer gaan word en doodgemaak sal word. So hy het geweet dat hy nie sal lewe wanneer Jesus terug kom nie.
Maar meeste Christene het hierdie verwagting gehad. Hulle het gewag vir die oomblik, die oogwink, die basuin wat sal blaas. Hulle het dit alles spoedig verwag. Maar intussen tyd het sommige begin sterf. Sommige het gesterf as martelare, sommige het gesterf as gevolg van siektes, ens.
Dan sê Paulus in 1 Thes 4:13, Moenie onkundig wees oor die wat gesterf het nie. Hulle sal eerste opstaan en dan sal ons wat lewe saam met hulle weggevoer word die Here tegemoed in die lug. Hulle gaan nie die wegraping mis nie. Hulle gaan nie die Koninkryk mis nie. Hulle gaan nie die toekomstige heerlikheid mis nie.
Maar toe Jesus nie kom nie en die jare verbystap, was die gelowiges onder geweldige druk, en met al die telleustellings van swaarkry in die lewe, het hulle ‘n maklik teiken geword vir die valse leraars.
Hier kom hulle dan en sê, “Waar is hierdie Jesus waarvoor julle so wag?” En vandag is ons nog 2000 jaar verder. Petrus sê dan, julle moet weet hoe hierdie spotters te werk gaan. Hulle val gelowiges aan waar hulle kwesbaar is. En daarom is hulle vandag ook baie effektief, want ons leef in ‘n tyd waarin selfs Christene nie meer belang stel in die wederkoms van Jesus Christus nie.
V3 sê dan verder dat, “…aan die einde van die dae spotters sal kom wat volgens hulle eie begeerlikhede wandel.”
Hoekom val hulle dan Christene aan en spot hulle? Want hulle wandel volgens hulle eie begeerlikhede. KJV sê, “…walking after their own lusts”. Die Griekse woord hier is “epithumia”, wat beteken, bose begeertes. Wat is dit wat hulle motiveer? Is dit hulle geleerdheid? Nee. Is dit omdat hulle geldige redes het om die wederkoms te bevraagteken? Nee. Jy sien, dit wat hulle motiveer is hulle bose begeertes.
Hoofstuk 2:2 sê, hulle volg hulle verderflikheid na, v10 sê, hulle loop agter die vlees in vuile begeerlikheid. V12 sê hulle is soos redelose diere wat die natuur volg, ens.
So hier het jy dit. Dit is die hoofrede waarom hulle spot en sê daar is nie ‘n wederkoms nie, nie omdat hulle verskil wanneer dit kom by die Skrif op ‘n intellektuele vlak nie. Nee! Hulle verwerp die wederkoms, want hulle wil dit nie glo nie. Dit pas nie hulle sondige bose leweswyse nie.
Hulle wil nie rekenskap gee nie. Hulle soek nie ‘n regter wat hulle oordeel nie. Hulle wil nie dink aan ‘n God wat Sy wraak gaan uitoefen nie. Bybelse eskatologie, Bybelse eindtyd pas net nie in, in hulle leefstyl nie.
Daarom is dit nie snaaks dat mense nie meer in ‘n Skepper glo nie, maar verkies om in die evolusie te glo. Want as God alles gemaak het, dan beteken dit dat Hy alles besit en as Hy alles besit, maak Hy die reëls en moet ons doen wat Hy sê. Ons moet dan aan Hom rekenskap gee.
‘n Evolusionis met die naam van Aldous Huxley, ‘n ateïs, het die volgende gesê, “…We objected to the morality because it interfered with our sexual freedom,”
Moenie dink dat filosowe so slim en intellektueel is nie. Hulle word gedryf deur hulle begeertes. Dit is hoekom daar ateïste is. Dit is hoekom mense glo in die evolusie of liberale teologie. Die Bybel meng in met hulle sondige lewenswyse en die vryheid wat hulle wil hê.
Hulle verwerp God, want hulle soek nie ‘n God wat hulle gaan oordeel oor hulle sondes nie. Hulle wil vry wees om te doen net wat hulle wil sonder enige skuldgevoelens. Dit is hulle motief.
So Petrus sê, “Dit moet julle veral weet, dat daar aan die einde van die dae spotters sal kom wat volgens hulle eie begeerlikhede wandel.”
Dan kom hulle en sê in v4
4 …Waar is die belofte van sy wederkoms? Want vandat die vaders ontslaap het, bly alles soos dit was van die begin van die skepping af.
Die spotters kom en sê, Waar is Hy? Hy’s nie hier nie. Meeste gelowiges in daardie tyd het geglo dat Hy sal kom in hulle leeftyd. Hy het nie gekom nie. En tot vandag toe het Hy nog nie gekom nie. O, en die valse leraars hou daarvan om hierop te kapitaliseer. (Hulle vra:) Hoe kan julle vandag nog in die wederkoms glo? Kan julle nie sien dat alles maar nog net so is, soos wat dit van die begin af was nie. Waar is hierdie belofte van sy wederkoms?
Vandat die vaders ontslaap, en dit verwys na die mense heel in die begin, het niks verander nie. Jy sien die duiwel wil nie hê dat mense moet glo dat daar iets katastrofies gaan gebeur in die toekoms nie. Alles gaan maar nog net aan soos altyd en sal altyd so aangaan.
Kyk hoe dom redeneer hulle: Dit is soos om te sê, “Ek het nog nooit doodgegaan nie, so ek sal nooit doodgaan nie.” “Ek het nog nooit siek geword nie, so ek sal nooit siek word nie.” O, OK! Is jy dood seker daarvan?
Alles het nie maar net verloop soos dit nog altyd verloop het nie. Dit sal nie moeilik wees om ‘n half miljoen mense in Indonesië te oortuig dat alles nie meer dieselfde is, nadat die tsunami hulle getref het nie. Jy gaan sukkel om mense te oortuig dat alles maar net soos voorheen sal aangaan nadat ‘n honderd duisend mense dood is in ‘n aardbewing nie.
In 1918 met die eerste wêreld oorlog is ‘n honderd miljoen mense dood aan ‘n griep virus en hulle het op daardie stadium niks geweet van die griep virus nie. Mediese dokters het nie geweet wat om te doen nie. Eers 30 jaar later het hulle ‘n oplossing gevind.
Hoe kan mense dan vandag sê, dat alles sal maar net aangaan soos in die verlede. Ek wil vir jou sê, tye het verander. Ons sit vandag met pessiektes wat nooit bestaan het in die verlede nie. Die geskiedenis van die mensdom het nog nooit so baie aardbewings en natuurrampe gesien nie soos vandag nie. Dinge word nie beter of bly nie net dieselfde nie, maar alles word net erger.
Evolusie en ateïsme is net iets wat mense gebruik om hulleself te bevry om te doen net wat hulle wil. Hulle soek nie ‘n God wat vir hulle sê wat om te doen en wat om nie te doen nie. Hulle wil leef volgens hulle eie begeertes.
Hoe antwoord Petrus dan die spotters? Hoe help hy ons om nie te val vir hierdie valse leraars nie? Hoor wat sê hy,
2 Pet 3:1 Dit is reeds die tweede brief, geliefdes, wat ek aan julle skrywe. In albei wil ek deur herinnering julle suiwere gesindheid opwek,
Let op na daardie woorde, “julle suiwere gesindheid.” Die KJV sê, “…which I stir up your pure minds by way of remembrance.” Julle suiwere verstand of gedagtes. Hy wek ons suiwere verstand op, sodat ons kan onderskei. 1 Kor 2 sê ons het die sin van Christus, the mind of Christ.
Romeine 12 sê dat ons gedagtes vernuwe moet word sodat ons kan beproef wat die welgevalle en volmaakte wil van God is. Jy kan nie jou verstand afskakel nie. Jy moet juis jou verstand aanskakel en toelaat dat God jou verstand sal verlig en vernuwe.
Petrus sê in hoofstuk 2:12 dat die valse leraars is soos irrationele, redelose diere wat die natuur volg. As jou verstand afgeskakel is, is jy soos ‘n redelose dier. Maar Petrus sê, ek wil julle suiwere gesindheid, julle suiwere verstand opwek deur julle te herinner.
Nou, waaraan wil hy hulle herinner? V2
2 Pet 3:2 sodat julle die woorde kan onthou wat deur die heilige profete tevore gespreek is, en die gebod van ons, apostels van die Here en Verlosser.
Die heilige profete, soos Jesaja, Sefanja, Maleagi en nog ander het gepraat oor die finale oordeel. Jesaja praat van die einde van die wêreld en die nuwe hemel en die nuwe aarde. Die Nuwe Testament vertel ons van die goddelike oordeel. Paulus sê,
Rom 1:18 Want die toorn van God word van die hemel af geopenbaar oor al die goddeloosheid en ongeregtigheid van die mense wat in ongeregtigheid die waarheid onderdruk,
2 Thes 1:7 en aan julle wat verdruk word, verligting te gee saam met ons in die openbaring van die Here Jesus uit die hemel met sy magtige engele
8 in vuur en vlam, wanneer Hy wraak uitoefen op die wat God nie ken nie en op die wat aan die evangelie van onse Here Jesus nie gehoorsaam is nie.
Die Bybel is baie duidelik, daar is ‘n finale oordeel oppad en God sal wraak uitoefen oor die wat Hom nie ken nie.
Wanneer die spotters sê alles gaan maar nog aan soos altyd, dan sê Petrus,
2 Pet 3:5 Want moedswillig vergeet hulle dat daar van lankal af hemele was en 'n aarde wat uit water en deur water ontstaan het deur die woord van God,
6 waardeur die toenmalige wêreld met water oorstroom is en vergaan het.
Hulle kies om te vergeet. Die KJV sê, they willingly are ignorant. Dit beteken eenvoudig, “they are dumb on purpose”. Hulle kies om dom te wees soos redelose diere. Hulle vergeet van die skepping. Is dit nie wat hulle vandag doen met die evolusieleer nie? Die evolusie leer sê daar is nie ‘n God nie, en daarom is daar nie wette of reëls nie en daarom is jy jou eie god en kan jy doen nie wat jy wil.
Hulle wil sondig, hulle wil doen net wat hulle wil, en kies om nie te dink aan God se oordeel nie. v6 sê dan dat hulle vergeet dat die toenmalige wêreld met water oorstroom en vergaan het. Hulle vergeet die Skepping en hulle vergeet die vloed.
Dit is Noag se vloed. En hoekom kies hulle om te vergeet van die vloed? Want die vloed spreek van God se oordeel. Net agt mense het oorleef, Noag en sy vrou, sy drie seuns en hulle vrouens.
Matt 24:37 En net soos die dae van Noag was, so sal ook die koms van die Seun van die mens wees.
En hoe was dit in die dae van Noag?…mense het gespot. Mense het hul verlustig in hulle sondige begeertes. Hulle het nie belanggestel in die waarheid nie.
Net so, sal dit wees in die laaste dae.
Slot
1 Pet 4:7 En die einde van alle dinge is naby; wees dan ingetoë en nugter, om te kan bid.
God het alles gemaak, daarom besit Hy alles. Omdat Hy alles besit maak Hy die reëls en moet ek en jy uitvind wat Hy van my en jou wil hê.
Het God nie gesê, jy mag nie ‘n leuen vertel nie? Het jy al ‘n leuen vertel?
Het God nie gesê, jy mag nie steel nie? Het jy al gesteel?
As God jou oordeel volgens Sy standaard, is jy skuldig of onskuldig?
Jak 2:10 Want wie die hele wet onderhou, maar in een opsig struikel, het aan almal skuldig geword.
En sonde moet gestraf word, maar die goeie nuus is dat Jesus het klaar jou sondestraf gedra. Jy hoef nie vir jou sonde te betaal nie. Jesus het dit klaar gedoen toe Hy aan die kruis gesterf het.
Plaas jou geloof in Jesus Christus en Hy sal jou sondes vergewe as jy dit voor Hom bely. Die Bybel sê Hy is getrou en regverdig om jou van alle ongeregtigheid te reinig.
Subscribe to:
Posts (Atom)
